ઓસ્ટ્રેલિયા ક્રિકેટના સ્ટાર ખેલાડી અને ચેમ્પિયન્સ ટ્રોફીના કેપ્ટન સ્ટીવ સ્મિથે વન ડે ઇન્ટરનેશનલ ક્રિકેટમાંથી સન્યાસ લેવાનું એલાન કર્યું છે.
એમણે મંગળવારે દુબઈમાં ભારત વિરુદ્ધ રમાયેલી આઇસીસી ચેમ્પિયન્સ ટ્રોફીના સેમી ફાઇનલમાં મળેલી હાર બાદ આ ર્નિણય લીધો છે. મેચ બાદ સ્મિથે પોતાના સાથીઓને જણાવ્યું કે, તેઓ સન્યાસ લઇ રહ્યા છે. ક્રિકેટ ઓસ્ટ્રેલિયાએ જણાવ્યું કે, સ્મિથ ટેસ્ટ અને ટી૨૦ ઇન્ટરનેશનલ રમતા રહેશે. ભારતે સેમિફાઇનલમાં ૨૬૪ રન પર ઓસ્ટ્રેલિયાને ઓલઆઉટ કર્યા પછી ૪ વિકેટે જીત નોંધાવી હતી.
ચેમ્પિયન્સ ટ્રોફી પહેલા ઓસ્ટ્રેલિયન ક્રિકેટ ટીમના કેપ્ટન પેટ કમિન્સના ઈજાના કારણે બહાર થઈ ગયા બાદ સ્ટીવ સ્મિથને ઓસ્ટ્રેલિયન ક્રિકેટ ટીમનો કેપ્ટન બનાવવામાં આવ્યો હતો. સ્મિથે કહ્યું, “તે એક અદ્ભુત યાત્રા રહી છે અને મેં દરેક ક્ષણનો આનંદ માણ્યો છે. ત્યાં ઘણી અદ્ભુત ક્ષણો અને અદ્ભુત યાદો રહી છે. બે વર્લ્ડ કપ જીતવા એ એક મહાન સિદ્ધિ હતી અને આ પ્રવાસમાં મને ઘણા અદ્ભુત સાથી ખેલાડીઓનો સાથ મળ્યો. હવે ૨૦૨૭ વર્લ્ડ કપની તૈયારી શરૂ કરવાનો સારો સમય છે, તેથી મને લાગે છે કે રસ્તો આપવાનો આ યોગ્ય સમય છે.”
૨૦૧૦માં વેસ્ટ ઈન્ડિઝ સામે લેગ-સ્પિનિંગ ઓલરાઉન્ડર તરીકે ડેબ્યૂ કર્યા બાદ, સ્મિથે ૧૭૦ વનડે મેચ રમી જેમાં તેણે ૪૩.૨૮ની એવરેજથી ૫૮૦૦ રન બનાવ્યા. આ દરમિયાન તેણે ૧૨ સદી અને ૩૫ અડધી સદી ફટકારી હતી. તેણે ૩૪.૬૭ની એવરેજથી ૨૮ વિકેટ પણ લીધી હતી. સ્મિથ ઓસ્ટ્રેલિયાની ૨૦૧૫ અને ૨૦૨૩ આઇસીસી વર્લ્ડ કપ વિજેતા ટીમનો સભ્ય હતો. ૨૦૧૫માં વનડે ટીમનો કેપ્ટન બન્યો અને ચેમ્પિયન્સ ટ્રોફી દરમિયાન ઈજાગ્રસ્ત પેટ કમિન્સની ગેરહાજરીમાં ટીમનું નેતૃત્વ કર્યું